Joan den astean, Diseinua eta Altzari hornikuntza zikloko 2. mailako ikasleek irteera izan zuten, prestakuntza teknikoa eta ondare historikoaren ezagutza uztartuz. Jardunaldiak bi geltoki nagusi izan zituen: LOGOS enpresa eta Igartubeiti Baserri Museoa.
Goizeko lehen orduan, ikasleek Logos enpresaren egoitza bisitatu zuten. Sukaldeko altzarien diseinuan eta fabrikazioan erreferente den enpresa honetan, ikasleek bertatik bertara ikusi ahal izan zuten egungo industria-prozesua. Diseinu-faseko sormenetik hasi eta ekoizpen-kateko doitasunera arte, altzarigintzaren sektoreko digitalizazioa eta kalitate-kontrolak nola aplikatzen diren ikasteko aukera bikaina izan zen.
Industria modernoaren ostean, ikasle taldeak iraganera bidaiatu zuen Igartubeiti Baserri Museoa bisitatuz. Kasu honetan, egurraren erabilera tradizionala izan zen ardatza. XVI. mendeko dolare-baserri honetan, garai bateko eraikuntza-teknikak eta egurrezko egitura konplexuak aztertu zituzten, diseinuaren eta artisautzaren sustraiak hobeto ulertzeko.
